Cando un neno africano chega ao noso país, é coma se un anaquiño de África nos viñese visitar. Cando unha nena sudamericana nos fala, regálanos a dozura da súa linguaxe. Cando un neno oriental nos sorrí, no seu sorriso agóchanse tesouros milenarios. Todos nos traen o agasallo dos seus países, da súa lingua, da súa historia. Que parvos seriamos se, por medo ao diferente, rexeitásemos estes presentes! Que pobres seriamos se mirásemos só a pel e non o que se oculta detrás das miradas!
